نرعل ونتكبر وحنا من الطين..
والكل منا صد لأقبل خويه..
نفخر نقول إنا على الصد قاوين..
وهي علينا في الحقيقة قوية..
نشفق على الطيبة وكسب الكريمين..
وهذي بنا لاشك فعلة ردية..
ننسى نهايتنا وعلى وين ماشين..
وننسى الزمان اللي جمعنا سوية..
المشكلة ما هي بحاجة لتخمين..
ولاهي بعد ياناس صعبة القضية..
دق الرقم كيفك هلا فيك وأهلين..
أنا الخوي اللي مزعل خويه..
قله تغيب وصورتك داخل العين..
ويبقى لحبك في خفوقي بقية..
أخوان حنا ولو يجي بيننا شين..
ما نفترق دام المحبة ندية..
خلك قوي لا تحتكرك الشياطين..
قبل الفوات وقبل وقت المنية..
كلم خويك بأطيب الهرج واللين..
واعرف جميل الهرج يمسح رديه..
هذي هي الدنيا من اللحين للحين..
لابد بين الناس تحصل خطية..
ومن لا يقدر غلطة أحبابه اللحين..
يقرا حروفي ويعتبرها هدية..
باكر تمر سنـــين وسنـــــين وسنــــــين..
والكل يرحل في الدروب المدية..
صدقني تندم واذكر حروفنا زين..
تندم على خلك إذا غاب ضيه..
دنيا غريبة وأكثر الناس ماشين..
وكم صاحب والله دفنته بيديه..
تحيــاتيــــ
مـــــــجروـحة